Psa 1 | MPS | STEP | Doloba pai bidi dali, dwai bidi dali side po wai. Niwai bidi agai te dwai bidigo po wali pisiąbo bidi, tama dwai sęgę sai bidigo tųde bilibo menio, tama God dali posobo po wabo bidi dali taluama, dulaluyu bidibo menio, tama tiyu, te bidi aga dwagi yai homu mu eyu bidaibao.

a[Jer 17:8 ]

Psalms 1

Buku 1

(Tib 1-41)

Doloba pai bidi dali, dwai bidi dali side po wai.

1 Niwai bidi agai
te dwai bidigo po wali pisiąbo bidi,
tama dwai sęgę sai bidigo tųde bilibo menio,
tama God dali posobo po wabo bidi
dali taluama, dulaluyu bidibo menio,
tama tiyu, te bidi aga
dwagi yai homu mu eyu bidaibao.
2 Magi baso meni, te bidigo Genuai Bidi Godigo
bomo yai po naga godolo mu eyu,
te po wali pabo dao.
Tama agai te bomo yai po siade dali, hulide dali nedeyu,
tede homugo kone paliyu ebo dao.
3 Te bidi te ni bidi mego ąį sesegede
bulai ni elalubo tiwai bidibao.
Te nigo nedudu walobo,
te sogo dolo naga waliyu ebo dao,
tama te ni yabe me sasia pabo menio.
Tama tigidali sę agai ebaso,
te bugagia pedalobo dao. ^a

4 Tiali goli, dwai bidi dabe augwali
te tiwai gilama mu menio.
Augwali te tubo nai wit bo
te waligo selasa pabo tiwai ebo dao,
te yalala pai olo nai mu dao.
5 Tama tiyu, dwai bidi dabe augwaligo
Godigo po tų ebo aiyaba elalugobeo.
Awe, te dwai sęgę sai bidi dabe,
augwali doloba pai bidi bidibo hani
tomode bidigobeo.
6 Magi baso meni, Godigo te doloba pai bidi dabe
bugagia tonalubo dao,
tialima dwai kolesaga ebo bidi dabe,
augwali dwai dene ebo bulude
bidada peyu, bidada pabo elalubo.